Meðlimir þjóðlagasveitarinnar Flamboiant frá Mónakó komu til landsins í morgun, en þeir munu halda tónleika í Laugardalshöll í kvöld. Búast þeir félagar við húsfylli, þrátt fyrir að enginn á Íslandi kannist við hljómsveitina, enda hún gersamlega óþekkt utan heimalandsins.
"Við erum mjög vinsælir í Mónakó, það þekkir okkur hvert mannsbarn þar, skilurðu," sagði Georges Reiner forsprakki hljómsveitarinnar. "Það var löngu kominn tími til að leita út fyrir landsteinana með tónlist okkar."
Georges segir flugfélagið Monaco-air hafa aðstoðað hljómsveitina með tilboði þar sem íbúum Mónakó var boðið flug og tónleikamiði á hagstæðu verði. "Þannig að við fyllum alveg húsið þó Íslendingar vilji ekki koma og sjá okkur," sagði Georges að lokum.
Óska eftir að kaupa
úrvalsdeildarlið í ensku knattspyrnunni. Skipti á ítölsku 2. deildar liði koma til greina. A.v.á.
Það er sérlega ánægjulegt að taka við viðurkenningu fyrir hönd Baggalúts fyrir framúrskarandi rekstur samsteypunnar, og þar með hluti af þeim 2% fyrirtækja sem geta státað af slíkum árangri. Ljóst er að yfirgnæfandi hluti íslensks atvinnulífs er í tómu tjóni og órafjarri frá því að vera framúrskarandi á nokkurn hátt. Mættu þau taka Baggalút og önnur almennileg fyrirtæki sér til fyrirmyndar og hysja upp um sig rekstrarbrækurnar.
Það eru tíu lykilatriði atriði sem hafa komið Baggalúti á þennan eftirsóknarverða stað, sem rétt er að deila með áhugasömum:
- Ekkert starfsfólk
- Engin viðvera
- Ekkert húsnæði
- Engin þjónusta
- Engin gildi
- Engin frí
- Engin áhætta
- Ekkert internetsamband
- Enginn samningsvilji
- Engin kaffivél
Beri önnur fyrirtæki gæfu til að fylgja fordæmi okkar er ljóst að íslenskur fyrirtækjamarkaður yrði skjótt heilbrigðari og næði undraskjótt að skipa sér í fremstu röð í heiminum. En til þess er lítil von, meðan íslenskir stjórnendur eru upp til hópa óhæfar, ákvarðanafælnar gungur með allan sinn rekstur á bólakafi uppi í bakraufinni á sér.
Góðar stundir.