Það er mörgum enn í fersku minni þegar Jón Jóel Jónsson var valinn fegursta barn Evrópu árið 1979, þá fjögurra ára gamall. Það var jafnframt í fyrsta og eina skipti sem sú keppni, Europe's Cutest, var haldin en aðalhvatamaður hennar og skipuleggjandi, sir Üdolf Bjelk, var skömmu síðar handtekinn og dæmdur fyrir glæpi gegn mannkyninu í seinna stríði.
Hvað um það. Jón Jóel er þrítugur í dag og býr í Grafarvoginum ásamt unnusta sínum og aldraðri móður. Hann segir titilinn vissulega hafa haft áhrif á líf sitt. Hann var andlit bleyjurisans Bossanova þangað til hann var 12 ára gamall og eftir það naut söngferill hans með hljómsveitinni Marmelade Shuffle Queens góðs af því orðspori sem keppnin skapaði honum.
„Maður er auðvitað ekkert knússímússí rúsínurassgat lengur, en þetta hjálpar, vissulega gerir það það,“ sagði Jón Jóel að lokum aðspurður um hvort titillinn hafi enn áhrif á núverandi starf hans sem héraðsdómslögmaður.
Kynvillingar!
Flottu Spartakusbúningarnir komnir aftur, nú líka í gylltu. Búningaleiga Bidda og Bjössa.
Það er sérlega ánægjulegt að taka við viðurkenningu fyrir hönd Baggalúts fyrir framúrskarandi rekstur samsteypunnar, og þar með hluti af þeim 2% fyrirtækja sem geta státað af slíkum árangri. Ljóst er að yfirgnæfandi hluti íslensks atvinnulífs er í tómu tjóni og órafjarri frá því að vera framúrskarandi á nokkurn hátt. Mættu þau taka Baggalút og önnur almennileg fyrirtæki sér til fyrirmyndar og hysja upp um sig rekstrarbrækurnar.
Það eru tíu lykilatriði atriði sem hafa komið Baggalúti á þennan eftirsóknarverða stað, sem rétt er að deila með áhugasömum:
- Ekkert starfsfólk
- Engin viðvera
- Ekkert húsnæði
- Engin þjónusta
- Engin gildi
- Engin frí
- Engin áhætta
- Ekkert internetsamband
- Enginn samningsvilji
- Engin kaffivél
Beri önnur fyrirtæki gæfu til að fylgja fordæmi okkar er ljóst að íslenskur fyrirtækjamarkaður yrði skjótt heilbrigðari og næði undraskjótt að skipa sér í fremstu röð í heiminum. En til þess er lítil von, meðan íslenskir stjórnendur eru upp til hópa óhæfar, ákvarðanafælnar gungur með allan sinn rekstur á bólakafi uppi í bakraufinni á sér.
Góðar stundir.