Fálki náðist í fjörunni á Breiðdalsvík í fyrradag, en hann virðist hafa lent í grútarmengun og er því ófleygur. Hann var í fyrstu settur í bráðabirgðabúr á Hótel Bláfelli, en var síðan sendur til Reykjavíkur í gærkvöldi, þar sem starfsmenn Náttúrufræðistofnunar tóku við honum.
Að sögn Njáls Torfasonar, hótelhaldara á Breiðdalsvík, sem fann fálkann, virðist hann vera ágætlega haldinn, þrátt fyrir óhappið.
Talið er að fuglinn sem hefur hlotið nafnið Falco sé með laskaðan væng enda hafa allar tilraunir starfsmanna Náttúrufræðistofnunar til þess að koma honum á loft mistekist. Von er á sérstakri valslöngvu til landssins eftir helgi og verður þá vonandi hægt að koma fuglinum í nægilega hæð til þess að hann komist á flug.
Siðprúð stúlka
getur fengið ljetta vinnu við húsverk á góðu heimili. Góð dönskukunnátta áskilin. Sjúklega hátt kaup.
Það er sérlega ánægjulegt að taka við viðurkenningu fyrir hönd Baggalúts fyrir framúrskarandi rekstur samsteypunnar, og þar með hluti af þeim 2% fyrirtækja sem geta státað af slíkum árangri. Ljóst er að yfirgnæfandi hluti íslensks atvinnulífs er í tómu tjóni og órafjarri frá því að vera framúrskarandi á nokkurn hátt. Mættu þau taka Baggalút og önnur almennileg fyrirtæki sér til fyrirmyndar og hysja upp um sig rekstrarbrækurnar.
Það eru tíu lykilatriði atriði sem hafa komið Baggalúti á þennan eftirsóknarverða stað, sem rétt er að deila með áhugasömum:
- Ekkert starfsfólk
- Engin viðvera
- Ekkert húsnæði
- Engin þjónusta
- Engin gildi
- Engin frí
- Engin áhætta
- Ekkert internetsamband
- Enginn samningsvilji
- Engin kaffivél
Beri önnur fyrirtæki gæfu til að fylgja fordæmi okkar er ljóst að íslenskur fyrirtækjamarkaður yrði skjótt heilbrigðari og næði undraskjótt að skipa sér í fremstu röð í heiminum. En til þess er lítil von, meðan íslenskir stjórnendur eru upp til hópa óhæfar, ákvarðanafælnar gungur með allan sinn rekstur á bólakafi uppi í bakraufinni á sér.
Góðar stundir.