Lýst hefur verið yfir tímabundnu neyðarástandi á landinu. Er fólki ráðlagt að halda sig í loftvarnarbyrgjum sínum fram á næstkomandi laugardag, að öðrum kosti sé ekki hægt að tryggja öryggi þess.
"Já, ástandið er komið úr appelsínugulu yfir í rautt," sagði Pétur Petruson forstöðumaður Almannavarna. "Það var slæmt fyrir, versnaði enn kringum áramótin og nú er það orðið mjög hættulegt."
Þá er fólki ráðlagt að taka engin dýr með sér í byrgin og hleypa alls ekki neinum kindum inn ef þær knýja dyra, hversu mikinn fagurgala sem þær hafa í frammi.
"Við erum náttúrulega aldrei spurðir álits þegar kemur að stjórnskipulagi," sagði Pétur að lokum. "Bara eins gott að kjarnorkuvopnabúr landsins er vel falið..."
Greiðendur fasteignagjalda!
Munið að þótt þið eigið í raun minna en ekkert í húsunum ykkar og bankinn gæti hirt þau af ykkur hvenær sem er, þá verðið þið samt sem áður að borga fasteignagjöldin. Svona erum við ógeðslega sniðug!
Sveitarfélögin
Það er sérlega ánægjulegt að taka við viðurkenningu fyrir hönd Baggalúts fyrir framúrskarandi rekstur samsteypunnar, og þar með hluti af þeim 2% fyrirtækja sem geta státað af slíkum árangri. Ljóst er að yfirgnæfandi hluti íslensks atvinnulífs er í tómu tjóni og órafjarri frá því að vera framúrskarandi á nokkurn hátt. Mættu þau taka Baggalút og önnur almennileg fyrirtæki sér til fyrirmyndar og hysja upp um sig rekstrarbrækurnar.
Það eru tíu lykilatriði atriði sem hafa komið Baggalúti á þennan eftirsóknarverða stað, sem rétt er að deila með áhugasömum:
- Ekkert starfsfólk
- Engin viðvera
- Ekkert húsnæði
- Engin þjónusta
- Engin gildi
- Engin frí
- Engin áhætta
- Ekkert internetsamband
- Enginn samningsvilji
- Engin kaffivél
Beri önnur fyrirtæki gæfu til að fylgja fordæmi okkar er ljóst að íslenskur fyrirtækjamarkaður yrði skjótt heilbrigðari og næði undraskjótt að skipa sér í fremstu röð í heiminum. En til þess er lítil von, meðan íslenskir stjórnendur eru upp til hópa óhæfar, ákvarðanafælnar gungur með allan sinn rekstur á bólakafi uppi í bakraufinni á sér.
Góðar stundir.