Hinn kunni landkönnuður og mannfélagsfræðingur Dr. Hörður P. Einarz hélt í dag blaðamannafund þar sem hann kynnti sláandi niðurstöðu rannsókna sinna á dreifingu greindar eftir aldri.
"Niðurstaðan er ótvíræð," sagði Hörður. "Auðvitað eru frávik, eins og alltaf í svona rannsóknum, en almennt séð er útkoman sú að greind virðist vera meiri meðal fullorðinna en barna."
Sem dæmi bendir Hörður á að börn kunni fæst að aka bíl. Þá sé talsvert um að yngri börn kunni ekki að lesa og að þau allra yngstu kunni jafnvel ekki að tala.
"Þetta er alveg með ólíkindum! Mér liggur nánast við að að segja að börn séu hreinlega heimsk!"
Geturðu ekki selt íbúðina?
Makaskipti gætu verið lausnin. Hafðu samband við ráðgjafa okkar eða mættu á kynningarfund.
Swing-klúbbur Reykjavíkur.
Það er sérlega ánægjulegt að taka við viðurkenningu fyrir hönd Baggalúts fyrir framúrskarandi rekstur samsteypunnar, og þar með hluti af þeim 2% fyrirtækja sem geta státað af slíkum árangri. Ljóst er að yfirgnæfandi hluti íslensks atvinnulífs er í tómu tjóni og órafjarri frá því að vera framúrskarandi á nokkurn hátt. Mættu þau taka Baggalút og önnur almennileg fyrirtæki sér til fyrirmyndar og hysja upp um sig rekstrarbrækurnar.
Það eru tíu lykilatriði atriði sem hafa komið Baggalúti á þennan eftirsóknarverða stað, sem rétt er að deila með áhugasömum:
- Ekkert starfsfólk
- Engin viðvera
- Ekkert húsnæði
- Engin þjónusta
- Engin gildi
- Engin frí
- Engin áhætta
- Ekkert internetsamband
- Enginn samningsvilji
- Engin kaffivél
Beri önnur fyrirtæki gæfu til að fylgja fordæmi okkar er ljóst að íslenskur fyrirtækjamarkaður yrði skjótt heilbrigðari og næði undraskjótt að skipa sér í fremstu röð í heiminum. En til þess er lítil von, meðan íslenskir stjórnendur eru upp til hópa óhæfar, ákvarðanafælnar gungur með allan sinn rekstur á bólakafi uppi í bakraufinni á sér.
Góðar stundir.