Neytendasamtökin tilkynntu í dag að vinsælasti jólamaturinn á borðum landsmanna um þessi jól eru hrægammar. Er þetta niðurstaða könnunar sem samtökin létu gera á dögunum.
"Þegar hrægammurinn fór að koma til landsins fyrir nokkrum árum var ljóst að vinsældir hans gætu orðið miklar og hefur neysla hans sem jólamatar aukist jafnt og þétt síðustu ár," sagði Freyr Arnes talsmaður Neytendasamtakanna.
"Fyrst í stað gætti töluverðra fordóma í garð hrægammsins, en þegar fólk fór að komast að því hversu mikið lostæti fuglinn er - meðal annars við smökkunarborð stórverslana - þá breyttist viðhorfið allsnarlega," sagði Freyr að lokum, en sjálfur ætlar hann að prófa lemúrasteik um þessi jól.
Kílóið af hrægammakjöti kostar um 5.000-6.000 krónur í flestum verslunum.
Api
óskast um borð í togarann Hertbert VE. Má ekki vera mjög sjóveikur.
Það er sérlega ánægjulegt að taka við viðurkenningu fyrir hönd Baggalúts fyrir framúrskarandi rekstur samsteypunnar, og þar með hluti af þeim 2% fyrirtækja sem geta státað af slíkum árangri. Ljóst er að yfirgnæfandi hluti íslensks atvinnulífs er í tómu tjóni og órafjarri frá því að vera framúrskarandi á nokkurn hátt. Mættu þau taka Baggalút og önnur almennileg fyrirtæki sér til fyrirmyndar og hysja upp um sig rekstrarbrækurnar.
Það eru tíu lykilatriði atriði sem hafa komið Baggalúti á þennan eftirsóknarverða stað, sem rétt er að deila með áhugasömum:
- Ekkert starfsfólk
- Engin viðvera
- Ekkert húsnæði
- Engin þjónusta
- Engin gildi
- Engin frí
- Engin áhætta
- Ekkert internetsamband
- Enginn samningsvilji
- Engin kaffivél
Beri önnur fyrirtæki gæfu til að fylgja fordæmi okkar er ljóst að íslenskur fyrirtækjamarkaður yrði skjótt heilbrigðari og næði undraskjótt að skipa sér í fremstu röð í heiminum. En til þess er lítil von, meðan íslenskir stjórnendur eru upp til hópa óhæfar, ákvarðanafælnar gungur með allan sinn rekstur á bólakafi uppi í bakraufinni á sér.
Góðar stundir.