Liðsmenn R-listans svokallaða leita nú logandi ljósi að eftirmanni Þórólfs Árnasonar borgarstjóra en hann hefur átt undir högg að sækja síðustu daga eftir að upp komst um þátt hans í samráði olíufélagana.
Illa gengur að finna frambærilegan einstakling í embættið enda dapurlegt úrval af leiðtogum í flokkunum þremur sem standa að listanum. Eftir mikla leit eru margir þó farnir að hallast að því að tefla fram Degi B. Eggertz sem hefur starfað að málefnum Borgarinnar meðfram því að sinna aðalstarfi sínu sem sýningardrengur, en hann hefur náð töluverðum frama sem slíkur undanfarin misseri.
Dagur, sem sérhæfir sig í að sitja fyrir í peysum, kvaðst í stuttu samtali stoltur af því að vera nefndur í þessu sambandi en taldi erfitt fyrir sig að helga sig alfarið Borginni því að „kasmírin væri sín sanna ást.“
Hvítþvottur
Nærðu ekki blóði hinna saklausu úr jakkafötunum? Láttu okkur um að hvítþvo mannorð þitt.
Þvottahús Ming Li Fu
Það er sérlega ánægjulegt að taka við viðurkenningu fyrir hönd Baggalúts fyrir framúrskarandi rekstur samsteypunnar, og þar með hluti af þeim 2% fyrirtækja sem geta státað af slíkum árangri. Ljóst er að yfirgnæfandi hluti íslensks atvinnulífs er í tómu tjóni og órafjarri frá því að vera framúrskarandi á nokkurn hátt. Mættu þau taka Baggalút og önnur almennileg fyrirtæki sér til fyrirmyndar og hysja upp um sig rekstrarbrækurnar.
Það eru tíu lykilatriði atriði sem hafa komið Baggalúti á þennan eftirsóknarverða stað, sem rétt er að deila með áhugasömum:
- Ekkert starfsfólk
- Engin viðvera
- Ekkert húsnæði
- Engin þjónusta
- Engin gildi
- Engin frí
- Engin áhætta
- Ekkert internetsamband
- Enginn samningsvilji
- Engin kaffivél
Beri önnur fyrirtæki gæfu til að fylgja fordæmi okkar er ljóst að íslenskur fyrirtækjamarkaður yrði skjótt heilbrigðari og næði undraskjótt að skipa sér í fremstu röð í heiminum. En til þess er lítil von, meðan íslenskir stjórnendur eru upp til hópa óhæfar, ákvarðanafælnar gungur með allan sinn rekstur á bólakafi uppi í bakraufinni á sér.
Góðar stundir.