Hingað til lands er kominn Færeyingurinn Jákup Skaale. Er hann sannkallaður hvalreki á fjörur Íslands, því hann er hvalreki sem mun halda til í fjörum Íslands næstu mánuði.
„Starfið felst í því að smala hvölunum saman á afmarkað svæði,“ sagði Jákup við komuna til landsins. „Þetta er erfitt starf, kannski svipað kúrekastarfinu, en með talsvert stærri kýr, híhíhí.“
Að sögn Jákups er tilgangurinn með hvalarekstri þríþættur: Að halda blóðþyrstum skepnunum frá því að ráðast á fólk í fjörum, ná þeim í hóp fyrir hvalaskoðunarferðir og loks að gera hvalveiðar auðveldari.
Nærgætin
stúlka óskast á gott heimili í Vesturbænum. Þarf að hafa reynslu af umönnun og umhirðu urðarkatta.
Það er sérlega ánægjulegt að taka við viðurkenningu fyrir hönd Baggalúts fyrir framúrskarandi rekstur samsteypunnar, og þar með hluti af þeim 2% fyrirtækja sem geta státað af slíkum árangri. Ljóst er að yfirgnæfandi hluti íslensks atvinnulífs er í tómu tjóni og órafjarri frá því að vera framúrskarandi á nokkurn hátt. Mættu þau taka Baggalút og önnur almennileg fyrirtæki sér til fyrirmyndar og hysja upp um sig rekstrarbrækurnar.
Það eru tíu lykilatriði atriði sem hafa komið Baggalúti á þennan eftirsóknarverða stað, sem rétt er að deila með áhugasömum:
- Ekkert starfsfólk
- Engin viðvera
- Ekkert húsnæði
- Engin þjónusta
- Engin gildi
- Engin frí
- Engin áhætta
- Ekkert internetsamband
- Enginn samningsvilji
- Engin kaffivél
Beri önnur fyrirtæki gæfu til að fylgja fordæmi okkar er ljóst að íslenskur fyrirtækjamarkaður yrði skjótt heilbrigðari og næði undraskjótt að skipa sér í fremstu röð í heiminum. En til þess er lítil von, meðan íslenskir stjórnendur eru upp til hópa óhæfar, ákvarðanafælnar gungur með allan sinn rekstur á bólakafi uppi í bakraufinni á sér.
Góðar stundir.