Sævar Björnsson, auglýsingateiknari, fagnar mjög aðgerðum lögreglu gegn harðsvíruðum og samviskulausum netverjum sem með skipulögðum hætti hafa grafið undan tónlistar- og kvikmyndaiðnaði, bæði innlendum og erlendum, með því að freista hrekklausra tölvunotenda með „ókeypis“ afþreyingu.
Sævar kveðst hafa orðið fyrir heldur óskemmtilegri reynslu þegar hann nýtti sér slíka þjónustu fyrir nokkrum árum:
„Þetta var hræðilegt. Við félagi minn vorum heima að sötra smá Cabernet sauvignon og sennilega hef ég verið búinn að fá mér aðeins of mikið því ég lét hann espa mig upp í að fara á netið. Eitt leiddi af öðru og áður en ég vissi af var ég búinn að sækja uppáhalds lagið okkar frá þessum glæponum og við farnir að dansa eins og vitleysingar í stofunni. Daginn eftir fór ég að missa hárið.“
Lagið sem um ræðir var „My heart will go on“ úr kvikmyndinni Titanic í flutningi Celine Dion.
Óvissuferð
Æðisleg og æsispennandi óvissuþrenna: Ekvador, Venezúela og Kolumbía. Upplifðu dásemdir Suður-Ameríku! Rauðvín, fögur fljóð og kókaín eins og þú getur í þig látið!
- Lúdóferðir
Það er sérlega ánægjulegt að taka við viðurkenningu fyrir hönd Baggalúts fyrir framúrskarandi rekstur samsteypunnar, og þar með hluti af þeim 2% fyrirtækja sem geta státað af slíkum árangri. Ljóst er að yfirgnæfandi hluti íslensks atvinnulífs er í tómu tjóni og órafjarri frá því að vera framúrskarandi á nokkurn hátt. Mættu þau taka Baggalút og önnur almennileg fyrirtæki sér til fyrirmyndar og hysja upp um sig rekstrarbrækurnar.
Það eru tíu lykilatriði atriði sem hafa komið Baggalúti á þennan eftirsóknarverða stað, sem rétt er að deila með áhugasömum:
- Ekkert starfsfólk
- Engin viðvera
- Ekkert húsnæði
- Engin þjónusta
- Engin gildi
- Engin frí
- Engin áhætta
- Ekkert internetsamband
- Enginn samningsvilji
- Engin kaffivél
Beri önnur fyrirtæki gæfu til að fylgja fordæmi okkar er ljóst að íslenskur fyrirtækjamarkaður yrði skjótt heilbrigðari og næði undraskjótt að skipa sér í fremstu röð í heiminum. En til þess er lítil von, meðan íslenskir stjórnendur eru upp til hópa óhæfar, ákvarðanafælnar gungur með allan sinn rekstur á bólakafi uppi í bakraufinni á sér.
Góðar stundir.