Leifur Hallmarsson, epagógískur hönnuður, hófst í morgun handa við að prjóna opinbera stjörnusambandsstöð sem reisa á undir Snæfellsjökli í vor. Er þetta í fyrsta skipti sem svo stór bygging er prjónuð, en að sögn Leifs eru slíkar byggingar ódýrar í gerð auk þess sem kyndingarkostnaður er nær enginn.
Við prjónaskapinn notast Leifur við kóbaltspunninn lopa og gegnheila manganprjóna - sem að sögn Leifs "...veitir kjörnámaðstæður til samstillingar og eykur sambandsleiðni til annarra lífstjarna".
Söngnám
Tek að mér einkakennslu í karókísöng. Hef víðtæka reynslu, bæði úr Ölveri, Singstar og Ædolinu. A.v.á.
Það er sérlega ánægjulegt að taka við viðurkenningu fyrir hönd Baggalúts fyrir framúrskarandi rekstur samsteypunnar, og þar með hluti af þeim 2% fyrirtækja sem geta státað af slíkum árangri. Ljóst er að yfirgnæfandi hluti íslensks atvinnulífs er í tómu tjóni og órafjarri frá því að vera framúrskarandi á nokkurn hátt. Mættu þau taka Baggalút og önnur almennileg fyrirtæki sér til fyrirmyndar og hysja upp um sig rekstrarbrækurnar.
Það eru tíu lykilatriði atriði sem hafa komið Baggalúti á þennan eftirsóknarverða stað, sem rétt er að deila með áhugasömum:
- Ekkert starfsfólk
- Engin viðvera
- Ekkert húsnæði
- Engin þjónusta
- Engin gildi
- Engin frí
- Engin áhætta
- Ekkert internetsamband
- Enginn samningsvilji
- Engin kaffivél
Beri önnur fyrirtæki gæfu til að fylgja fordæmi okkar er ljóst að íslenskur fyrirtækjamarkaður yrði skjótt heilbrigðari og næði undraskjótt að skipa sér í fremstu röð í heiminum. En til þess er lítil von, meðan íslenskir stjórnendur eru upp til hópa óhæfar, ákvarðanafælnar gungur með allan sinn rekstur á bólakafi uppi í bakraufinni á sér.
Góðar stundir.