Hinn kunni dulspekingur og epagókíski ráðgjafi, Gísli miðill, ritar grein í aprílhefti tímaritsins Popular Paranormal. Í greininni er skýrt frá tímamótarannsókn Gísla sem hann gerði síðastliðið sumar á hinum þekkta draugi Írafellsmóra.
Í greininni kemur fram að móri þessi sé í raun endurvarpsútfrymi annars draugs, Hallgríms Þórgnýssonar - fyrrverandi kaupmanns sem staddur er á annarri lífstjörnu, en hann kom skilaboðum um hið sanna til Gísla í draumi.
Það sem þó markar mest tímamót í rannsókn Gísla miðils eru ljósmyndir sem hann náði af draugnum, sem renna stoðum undir áðurnefnda kenningu hans.
Stúlka óskast
til að geta barn með síðasta íbúa afskekktrar eyjar á Breiðafirði. Gott kaup.
Það er sérlega ánægjulegt að taka við viðurkenningu fyrir hönd Baggalúts fyrir framúrskarandi rekstur samsteypunnar, og þar með hluti af þeim 2% fyrirtækja sem geta státað af slíkum árangri. Ljóst er að yfirgnæfandi hluti íslensks atvinnulífs er í tómu tjóni og órafjarri frá því að vera framúrskarandi á nokkurn hátt. Mættu þau taka Baggalút og önnur almennileg fyrirtæki sér til fyrirmyndar og hysja upp um sig rekstrarbrækurnar.
Það eru tíu lykilatriði atriði sem hafa komið Baggalúti á þennan eftirsóknarverða stað, sem rétt er að deila með áhugasömum:
- Ekkert starfsfólk
- Engin viðvera
- Ekkert húsnæði
- Engin þjónusta
- Engin gildi
- Engin frí
- Engin áhætta
- Ekkert internetsamband
- Enginn samningsvilji
- Engin kaffivél
Beri önnur fyrirtæki gæfu til að fylgja fordæmi okkar er ljóst að íslenskur fyrirtækjamarkaður yrði skjótt heilbrigðari og næði undraskjótt að skipa sér í fremstu röð í heiminum. En til þess er lítil von, meðan íslenskir stjórnendur eru upp til hópa óhæfar, ákvarðanafælnar gungur með allan sinn rekstur á bólakafi uppi í bakraufinni á sér.
Góðar stundir.