Innanhússpekúlantinn og mannvinurinn Valgerður Matthíasdóttir hefur gert samning við lögregluyfirvöld og skattrannsóknastjóra um samstarf við gerð þáttanna 'Innlit-Útlit'.
"..þetta verður fjögurra þátta sería um Baug," sagði Vala skælbrosandi og óþarflega hress í samtali við Baggalút. "..við förum heim til Jóns Ásgeirs, á skrifstofuna hans og vonandi á skútuna - hún er alveg brilljant!"
Valgerður reiknar með því að þættirnir verði mjög spennandi, enda fái hún tækifæri til að hnýsast enn nánar í einkalíf fólks en áður - auk þess telur hún 'æðislega jákvætt' að starfa með lögreglunni og fá þannig tækifæri til "..að vinna með alvöru karlmönnum svona einu sinni."
Lifandi fallbyssukúla
(fjárhagslega sjálfstæð) óskar eftir að kynnast reyklausum síamstvíburum, helst kvenkyns. Með nánari kynni í huga. Afgreiðsla vísar á.
Það er sérlega ánægjulegt að taka við viðurkenningu fyrir hönd Baggalúts fyrir framúrskarandi rekstur samsteypunnar, og þar með hluti af þeim 2% fyrirtækja sem geta státað af slíkum árangri. Ljóst er að yfirgnæfandi hluti íslensks atvinnulífs er í tómu tjóni og órafjarri frá því að vera framúrskarandi á nokkurn hátt. Mættu þau taka Baggalút og önnur almennileg fyrirtæki sér til fyrirmyndar og hysja upp um sig rekstrarbrækurnar.
Það eru tíu lykilatriði atriði sem hafa komið Baggalúti á þennan eftirsóknarverða stað, sem rétt er að deila með áhugasömum:
- Ekkert starfsfólk
- Engin viðvera
- Ekkert húsnæði
- Engin þjónusta
- Engin gildi
- Engin frí
- Engin áhætta
- Ekkert internetsamband
- Enginn samningsvilji
- Engin kaffivél
Beri önnur fyrirtæki gæfu til að fylgja fordæmi okkar er ljóst að íslenskur fyrirtækjamarkaður yrði skjótt heilbrigðari og næði undraskjótt að skipa sér í fremstu röð í heiminum. En til þess er lítil von, meðan íslenskir stjórnendur eru upp til hópa óhæfar, ákvarðanafælnar gungur með allan sinn rekstur á bólakafi uppi í bakraufinni á sér.
Góðar stundir.