Lögreglan hefur í samstarfi við landlæknisembættið og manneldisráð gefið út viðvörun þar sem fólk er varað við hinum ýmsu jólahlaðborðum sem í boði eru þetta árið.
Aukin samkeppni á þessum markaði hefur leitt til þess að boðið er upp á æ nýstárlegri rétti og hefur tilraunastarfsemi í matargerð á köflum farið út í öfgar að mati matvælaeftirlits.
Ekkert hefur verið sannað - en nýlegar tölur benda til að mun fleiri ferðamenn komi til landsins en skila sér aftur til baka. Þá hefur ógæfumönnum sýnilega fækkað á götum borgarinnar undanfarna daga og vikur, sem og mávum á tjörninni - og rottur og flækingskettir sjást varla.
Fólk er því beðið að hafa vara á sér, ekki leggja sér neitt til munns sem er annaðhvort mjög blóðugt eða löðrandi í sósu - og alls ekki vera eitt á ferli nálægt eldhúsi eða matreiðslumönnum.
Til sölu
Ljóst man. Á sama stað einnig töluvert af snæri.
A.v.á.
Það er sérlega ánægjulegt að taka við viðurkenningu fyrir hönd Baggalúts fyrir framúrskarandi rekstur samsteypunnar, og þar með hluti af þeim 2% fyrirtækja sem geta státað af slíkum árangri. Ljóst er að yfirgnæfandi hluti íslensks atvinnulífs er í tómu tjóni og órafjarri frá því að vera framúrskarandi á nokkurn hátt. Mættu þau taka Baggalút og önnur almennileg fyrirtæki sér til fyrirmyndar og hysja upp um sig rekstrarbrækurnar.
Það eru tíu lykilatriði atriði sem hafa komið Baggalúti á þennan eftirsóknarverða stað, sem rétt er að deila með áhugasömum:
- Ekkert starfsfólk
- Engin viðvera
- Ekkert húsnæði
- Engin þjónusta
- Engin gildi
- Engin frí
- Engin áhætta
- Ekkert internetsamband
- Enginn samningsvilji
- Engin kaffivél
Beri önnur fyrirtæki gæfu til að fylgja fordæmi okkar er ljóst að íslenskur fyrirtækjamarkaður yrði skjótt heilbrigðari og næði undraskjótt að skipa sér í fremstu röð í heiminum. En til þess er lítil von, meðan íslenskir stjórnendur eru upp til hópa óhæfar, ákvarðanafælnar gungur með allan sinn rekstur á bólakafi uppi í bakraufinni á sér.
Góðar stundir.