Vinirnir Dagmar, Grétar, Steinar og Arnar tóku sig til í morgun og blönduðu ógeðsdrykk fyrir helgina, en þau eru miklir aðdáendur þáttanna 70 mínútur á PoppTíVí, þar sem þáttastjórnendur blanda jafnan miður geðfellda drykki í hverjum þætti.
"Já, 70 mínútur eru alveg æði," sögðu krakkarnir einum rómi í viðtali við Baggalút. "Þetta er örugglega alveg ógeðslegur drykkur. Allavega er lyktin nógu vond!"
Vinirnir segjast ætla að bjóða öllum sem þeir þekkja í veislu um helgina og láta gestina bragða á drykknum, sem þau segja vera í sterkara lagi, en hann inniheldur meðal annars þvottaefni, rafgeymasýru, rottueitur og arsenik.
Kona óskast
hið fyrsta til að deila með þrifalegum karlmanni á fertugsaldri vel einangruðu neðanjarðarbyrgi meðan yfirvofandi heimsendir gengur yfir. Má ekki reykja.
Það er sérlega ánægjulegt að taka við viðurkenningu fyrir hönd Baggalúts fyrir framúrskarandi rekstur samsteypunnar, og þar með hluti af þeim 2% fyrirtækja sem geta státað af slíkum árangri. Ljóst er að yfirgnæfandi hluti íslensks atvinnulífs er í tómu tjóni og órafjarri frá því að vera framúrskarandi á nokkurn hátt. Mættu þau taka Baggalút og önnur almennileg fyrirtæki sér til fyrirmyndar og hysja upp um sig rekstrarbrækurnar.
Það eru tíu lykilatriði atriði sem hafa komið Baggalúti á þennan eftirsóknarverða stað, sem rétt er að deila með áhugasömum:
- Ekkert starfsfólk
- Engin viðvera
- Ekkert húsnæði
- Engin þjónusta
- Engin gildi
- Engin frí
- Engin áhætta
- Ekkert internetsamband
- Enginn samningsvilji
- Engin kaffivél
Beri önnur fyrirtæki gæfu til að fylgja fordæmi okkar er ljóst að íslenskur fyrirtækjamarkaður yrði skjótt heilbrigðari og næði undraskjótt að skipa sér í fremstu röð í heiminum. En til þess er lítil von, meðan íslenskir stjórnendur eru upp til hópa óhæfar, ákvarðanafælnar gungur með allan sinn rekstur á bólakafi uppi í bakraufinni á sér.
Góðar stundir.