Alþingi var sett í dag í 130. sinn. Sumir segja reyndar að þingið sé það 106. í röðinni og enn aðrir hið 145. Þing var sett með hefðbundnum hætti - þingheimur kom saman í Dómkirkjunni og spásseraði svo yfir götuna í Alþingishúsið. Þar héldu viðkomandi embættismenn ræður uns hringt var út í frímínútur skv. venju.
Eftir frímínútur dró hinsvegar til tíðinda þegar þær vinkonur Vigdís Finnbogadóttir og Ingibjörg Sólrún smygluðu sér inn í Þingsal og létu dólgslega. Hrópuðu þær m.a. ókvæðisorð að Össuri Skarphéðinssyni sem brá nokkuð, greip í ofboði um axlir Gunnars Birgissonar sem ósjálfrátt rak honum einn á lúðurinn. Vildi þá ekki betur til en svo að Jóhanna Sigurðardóttir átti þar leið framhjá og lenti Össur á henni með miklum hamagangi þannig að hún hentist fram í pontu og rak hægra hnéð í augað á forseta Alþingis sem við það gleypti blýant af gerðinni Pluto 2 1/2. Varð uppi fótur og fit við þetta og tóku þingmenn mjög að styggjast. Dómsmálaráðherra tókst þó að róa þingmenn nokkuð með því að skjóta fáeinum viðvörunarskotum úr riffli sem hann hafði í fórum sínum fyrir helbera tilviljun.
Samkoman leystist svo upp í hópslagsmál þar sem Framsóknarflokkurinn tuktaði til bæði Frjálslynda flokkinn og óháða fulltrúa Vinstri hreyfingarinnar græns framboðs.
Dagskrá Alþingis verður með hefðbundnu sniði í fyrramálið.
Tímavél
„nýleg“ - fæst gefins eða gegn sanngjörnu verði.
Það er sérlega ánægjulegt að taka við viðurkenningu fyrir hönd Baggalúts fyrir framúrskarandi rekstur samsteypunnar, og þar með hluti af þeim 2% fyrirtækja sem geta státað af slíkum árangri. Ljóst er að yfirgnæfandi hluti íslensks atvinnulífs er í tómu tjóni og órafjarri frá því að vera framúrskarandi á nokkurn hátt. Mættu þau taka Baggalút og önnur almennileg fyrirtæki sér til fyrirmyndar og hysja upp um sig rekstrarbrækurnar.
Það eru tíu lykilatriði atriði sem hafa komið Baggalúti á þennan eftirsóknarverða stað, sem rétt er að deila með áhugasömum:
- Ekkert starfsfólk
- Engin viðvera
- Ekkert húsnæði
- Engin þjónusta
- Engin gildi
- Engin frí
- Engin áhætta
- Ekkert internetsamband
- Enginn samningsvilji
- Engin kaffivél
Beri önnur fyrirtæki gæfu til að fylgja fordæmi okkar er ljóst að íslenskur fyrirtækjamarkaður yrði skjótt heilbrigðari og næði undraskjótt að skipa sér í fremstu röð í heiminum. En til þess er lítil von, meðan íslenskir stjórnendur eru upp til hópa óhæfar, ákvarðanafælnar gungur með allan sinn rekstur á bólakafi uppi í bakraufinni á sér.
Góðar stundir.