Konráð Vilmundarson áhugaleigubílstjóri hefur ekki farið varhluta af veðurblíðunni í sumar frekar en aðrir landsmenn.
Kveðst hann oft hafa verið "alveg að drepast úr hita" þegar hann ók um í sumar, jafnvel þótt loftræstingin væri á fullu og allar rúður niðri. Til að bregðast við þessu brá Konráð á það ráð að fjarlægja bílstjórahurðina af bílnum sínum.
Aðspurður að því hvort hann teldi ekki að honum yrði kalt í vetur sagði Konráð, "neinei, það var jú til að koma í veg fyrir slíkt sem ég setti steinolíumiðstöðina í bílinn síðasta vetur."
Til sölu
Rauður kafbátur. 20 manna. Ekinn 18.000 sjómílur. A.v.á.
Það er sérlega ánægjulegt að taka við viðurkenningu fyrir hönd Baggalúts fyrir framúrskarandi rekstur samsteypunnar, og þar með hluti af þeim 2% fyrirtækja sem geta státað af slíkum árangri. Ljóst er að yfirgnæfandi hluti íslensks atvinnulífs er í tómu tjóni og órafjarri frá því að vera framúrskarandi á nokkurn hátt. Mættu þau taka Baggalút og önnur almennileg fyrirtæki sér til fyrirmyndar og hysja upp um sig rekstrarbrækurnar.
Það eru tíu lykilatriði atriði sem hafa komið Baggalúti á þennan eftirsóknarverða stað, sem rétt er að deila með áhugasömum:
- Ekkert starfsfólk
- Engin viðvera
- Ekkert húsnæði
- Engin þjónusta
- Engin gildi
- Engin frí
- Engin áhætta
- Ekkert internetsamband
- Enginn samningsvilji
- Engin kaffivél
Beri önnur fyrirtæki gæfu til að fylgja fordæmi okkar er ljóst að íslenskur fyrirtækjamarkaður yrði skjótt heilbrigðari og næði undraskjótt að skipa sér í fremstu röð í heiminum. En til þess er lítil von, meðan íslenskir stjórnendur eru upp til hópa óhæfar, ákvarðanafælnar gungur með allan sinn rekstur á bólakafi uppi í bakraufinni á sér.
Góðar stundir.