Mágus Bernharðsson, dvergaræktandi, hefur þróað nýja tegund dverga sem hann fullyrðir að séu mun meðfærilegri en sambærilegir eldri dvergar.
„Helsta breytingin er sú að þessir þola allan þvott, bæði suðu og þeytivindu – en þeir eldri eyðilögðust yfirleitt ef farið var yfir 1000 snúninga og 60 gráður – þessir nýju kasta í versta falli upp ef maður notar forþvott eða mikinn klór, en þá er það yfirleitt bara spursmál að fóðra þá minna í nokkra daga og skella þeim síðan aftur í vélina og prófa sig áfram með lægri prógrömm.“
Til sölu
vel með farinn diskóbolti. A.v.á.
Það er sérlega ánægjulegt að taka við viðurkenningu fyrir hönd Baggalúts fyrir framúrskarandi rekstur samsteypunnar, og þar með hluti af þeim 2% fyrirtækja sem geta státað af slíkum árangri. Ljóst er að yfirgnæfandi hluti íslensks atvinnulífs er í tómu tjóni og órafjarri frá því að vera framúrskarandi á nokkurn hátt. Mættu þau taka Baggalút og önnur almennileg fyrirtæki sér til fyrirmyndar og hysja upp um sig rekstrarbrækurnar.
Það eru tíu lykilatriði atriði sem hafa komið Baggalúti á þennan eftirsóknarverða stað, sem rétt er að deila með áhugasömum:
- Ekkert starfsfólk
- Engin viðvera
- Ekkert húsnæði
- Engin þjónusta
- Engin gildi
- Engin frí
- Engin áhætta
- Ekkert internetsamband
- Enginn samningsvilji
- Engin kaffivél
Beri önnur fyrirtæki gæfu til að fylgja fordæmi okkar er ljóst að íslenskur fyrirtækjamarkaður yrði skjótt heilbrigðari og næði undraskjótt að skipa sér í fremstu röð í heiminum. En til þess er lítil von, meðan íslenskir stjórnendur eru upp til hópa óhæfar, ákvarðanafælnar gungur með allan sinn rekstur á bólakafi uppi í bakraufinni á sér.
Góðar stundir.