Hópur vísindamanna við Háskóla Íslands, vinnur nú að viðamikilli rannsókn á eðli tímans. Við rannsóknina notast hópurinn við fullkomnustu upplýsingatækni sem völ er á, veggklukku af Seiko-gerð og tvö Timex-armbandsúr með skeiðklukku. Að sögn Hannesar Jóhannessonar, verkefnisstjóra, miðar rannsókninni vel:
"Jú, það er rétt, við erum hér að rannsaka sjálft eðli tímans og beinast rannsóknir okkar einkum að því að finna vísindalega ástæðu þess hvers vegna klukkan er alltaf hálfþrjú á nákvæmlega sama tíma alla daga ársins".
Verkefnið er sjálfstætt framhald verkefnis sem hópurinn vann á síðasta ári en þar var sjónum beint að eðli hraðans:
"Já, síðasta verkefni fólst í því að finna út hvort kyrrstaða væri mælanleg - þ.e.a.s. hvort hægt væri að tala um mismikla kyrrstöðu á sama hátt og hraða. Niðurstaða okkar var sú að kyrrstaða er mjög mismunandi og fer algerlega eftir því á hve miklum hraða umhverfi mælds hlutar er", sagði Hannes í ruglingslegu samtali við Baggalút.
Krónufleyting á Tjörninni í kvöld kl. 20
Mætum og sýnum samstöðu.
Bankaráð Seðlabanka Íslands
Það er sérlega ánægjulegt að taka við viðurkenningu fyrir hönd Baggalúts fyrir framúrskarandi rekstur samsteypunnar, og þar með hluti af þeim 2% fyrirtækja sem geta státað af slíkum árangri. Ljóst er að yfirgnæfandi hluti íslensks atvinnulífs er í tómu tjóni og órafjarri frá því að vera framúrskarandi á nokkurn hátt. Mættu þau taka Baggalút og önnur almennileg fyrirtæki sér til fyrirmyndar og hysja upp um sig rekstrarbrækurnar.
Það eru tíu lykilatriði atriði sem hafa komið Baggalúti á þennan eftirsóknarverða stað, sem rétt er að deila með áhugasömum:
- Ekkert starfsfólk
- Engin viðvera
- Ekkert húsnæði
- Engin þjónusta
- Engin gildi
- Engin frí
- Engin áhætta
- Ekkert internetsamband
- Enginn samningsvilji
- Engin kaffivél
Beri önnur fyrirtæki gæfu til að fylgja fordæmi okkar er ljóst að íslenskur fyrirtækjamarkaður yrði skjótt heilbrigðari og næði undraskjótt að skipa sér í fremstu röð í heiminum. En til þess er lítil von, meðan íslenskir stjórnendur eru upp til hópa óhæfar, ákvarðanafælnar gungur með allan sinn rekstur á bólakafi uppi í bakraufinni á sér.
Góðar stundir.