Til að bregðast við aukinni samkeppni frá 'Ryan Air', sem í dag tilkynntu að þeir myndu gefa 300.000 flugmiða á næstu 3 mánuðum, hafa Flugleiðir ákveðið að gefa nokkrum heppnum farþegum flugvélar í jólamánuðinum. Um er að ræða eina Boeing 737 og tvo forláta Fokkera. Vinningshafarnir verða dregnir úr hópi Saga Class farþega hvers mánaðar.
Aðspurður um hvort þetta væri ekki full langt gengið svaraði talsmaður flugfélagsins, Arnar Loftsson: "Nei, blessaður vertu. Við höfum fulla trú á því að farþegum muni fjölga í kjölfarið. Auk þess erum við að draga saman seglin og þurfum að losna við eitthvað af þessu drasli – það er hvort eð ekki nokkur leið að koma þessu í verð eins og staðan er í dag".
Tímavél
„nýleg“ - fæst gefins eða gegn sanngjörnu verði.
Það er sérlega ánægjulegt að taka við viðurkenningu fyrir hönd Baggalúts fyrir framúrskarandi rekstur samsteypunnar, og þar með hluti af þeim 2% fyrirtækja sem geta státað af slíkum árangri. Ljóst er að yfirgnæfandi hluti íslensks atvinnulífs er í tómu tjóni og órafjarri frá því að vera framúrskarandi á nokkurn hátt. Mættu þau taka Baggalút og önnur almennileg fyrirtæki sér til fyrirmyndar og hysja upp um sig rekstrarbrækurnar.
Það eru tíu lykilatriði atriði sem hafa komið Baggalúti á þennan eftirsóknarverða stað, sem rétt er að deila með áhugasömum:
- Ekkert starfsfólk
- Engin viðvera
- Ekkert húsnæði
- Engin þjónusta
- Engin gildi
- Engin frí
- Engin áhætta
- Ekkert internetsamband
- Enginn samningsvilji
- Engin kaffivél
Beri önnur fyrirtæki gæfu til að fylgja fordæmi okkar er ljóst að íslenskur fyrirtækjamarkaður yrði skjótt heilbrigðari og næði undraskjótt að skipa sér í fremstu röð í heiminum. En til þess er lítil von, meðan íslenskir stjórnendur eru upp til hópa óhæfar, ákvarðanafælnar gungur með allan sinn rekstur á bólakafi uppi í bakraufinni á sér.
Góðar stundir.