Það er nú á allra vitorði að Bruce Dickinson, söngvari Iron Maiden eigi það til að fljúga fyrir Iceland Express.
Færri vita að hinn eldhressi Mikael Kiske, fyrrum söngvari þýsku sveitarinnar Helloween starfar nú hjá Strætó bs. og ekur leið 5. Lítið hefur farið fyrir Kiske undanfarin ár, en hann stofnaði þó nýlega sveitina Rauðsúpu sem æfir nú stíft í Breiðholtinu fyrir næstu Músíktilraunir.
Þá er gaman að geta þess að Joey Belladonna, fyrrum söngvari Anthrax á það til að þjóna til borðs í Norrænu og bræðurnir snoppufríðu Michael og Robert Sweet úr kristilegu þungarokkssveitinni Stryper bera út Fréttablaðið í Grafarvogi.
Leðurblökumenn
Fjölmennum í hópferð á kvikmyndina skemmtilegu, og raunsæju, um Rökkurriddarann. - Félagið
Það er sérlega ánægjulegt að taka við viðurkenningu fyrir hönd Baggalúts fyrir framúrskarandi rekstur samsteypunnar, og þar með hluti af þeim 2% fyrirtækja sem geta státað af slíkum árangri. Ljóst er að yfirgnæfandi hluti íslensks atvinnulífs er í tómu tjóni og órafjarri frá því að vera framúrskarandi á nokkurn hátt. Mættu þau taka Baggalút og önnur almennileg fyrirtæki sér til fyrirmyndar og hysja upp um sig rekstrarbrækurnar.
Það eru tíu lykilatriði atriði sem hafa komið Baggalúti á þennan eftirsóknarverða stað, sem rétt er að deila með áhugasömum:
- Ekkert starfsfólk
- Engin viðvera
- Ekkert húsnæði
- Engin þjónusta
- Engin gildi
- Engin frí
- Engin áhætta
- Ekkert internetsamband
- Enginn samningsvilji
- Engin kaffivél
Beri önnur fyrirtæki gæfu til að fylgja fordæmi okkar er ljóst að íslenskur fyrirtækjamarkaður yrði skjótt heilbrigðari og næði undraskjótt að skipa sér í fremstu röð í heiminum. En til þess er lítil von, meðan íslenskir stjórnendur eru upp til hópa óhæfar, ákvarðanafælnar gungur með allan sinn rekstur á bólakafi uppi í bakraufinni á sér.
Góðar stundir.