Ragnheiður Heiðarsdóttir, fyrrverandi ræstingakona, var fyrir tilviljun skipuð í stöðu viðskiptastjóra Búnaðarbankans fyrir skömmu. Svo virðist sem Ragnheiður hafi verið tekin í misgripum fyrir Elmar Elvarsson, framkvæmdastjóra gjaldeyrisviðskipta og hækkuð í tign.
Á þeim þremur vikum sem hún hefur setið á stóli viðskiptastjóra hefur hún m.a. keypt mikið hlutafé í ýmsum fyrirtækjum, t.d. Marhnútaeldisstöðinni hf, Efnalauginni Pésa, Flugfélagi Snæfells- og Hnappadalssýslu og Refapylsum hf. Að auki tókst henni að sameina Búnaðarbanka og Kaupþing, selja allt húsnæði bankans og láta koma fyrir sólbaðsaðstöðu á öllum kaffistofum.
Ragnheiður var leyst frá störfum í morgun þegar upp komst að hún hafði ítrekað hringt í systur sína í Lúxembúrg úr síma bankans.
Lamadýr
Höfum fengið í einkasölu nokkur lamadýr. Þrír litir: engifergult, mógrátt og hvítt. Skipti koma til greina - verða þó að vera nýleg klaufdýr.
Bílasalan Bílver
Það er sérlega ánægjulegt að taka við viðurkenningu fyrir hönd Baggalúts fyrir framúrskarandi rekstur samsteypunnar, og þar með hluti af þeim 2% fyrirtækja sem geta státað af slíkum árangri. Ljóst er að yfirgnæfandi hluti íslensks atvinnulífs er í tómu tjóni og órafjarri frá því að vera framúrskarandi á nokkurn hátt. Mættu þau taka Baggalút og önnur almennileg fyrirtæki sér til fyrirmyndar og hysja upp um sig rekstrarbrækurnar.
Það eru tíu lykilatriði atriði sem hafa komið Baggalúti á þennan eftirsóknarverða stað, sem rétt er að deila með áhugasömum:
- Ekkert starfsfólk
- Engin viðvera
- Ekkert húsnæði
- Engin þjónusta
- Engin gildi
- Engin frí
- Engin áhætta
- Ekkert internetsamband
- Enginn samningsvilji
- Engin kaffivél
Beri önnur fyrirtæki gæfu til að fylgja fordæmi okkar er ljóst að íslenskur fyrirtækjamarkaður yrði skjótt heilbrigðari og næði undraskjótt að skipa sér í fremstu röð í heiminum. En til þess er lítil von, meðan íslenskir stjórnendur eru upp til hópa óhæfar, ákvarðanafælnar gungur með allan sinn rekstur á bólakafi uppi í bakraufinni á sér.
Góðar stundir.