Ríkissáttasemjari boðaði í nótt til verkfalls frá og með í gær. "Ég er bara búinn að fá mig gersamlega fullsaddan á þessu kjaftæði, það er bara svo og svo mikið sem ein manneskja þolir af nöldri, naggi, svívirðingum og þvættingi - og það á skítakaupi," sagði ríkissáttasemjari í viðtali við Baggalút, en hann hefur undanfarin ár staðið í ströngu við samningagerð.
"Fólk hugsar aldrei um hvernig mér líður - hvernig haldiði að það sé að hafa hóp tónlistarkennara, marga óperumenntaða, organdi yfir sér heilu og hálfu daganna, eða sjúkraþjálfa sem klappa manni á bakið á þann hátt að maður kennir til í margar vikur á eftir. Svo étur þetta lið allt bakkelsið frá manni og maður er að koma sársvangur heim, eftir að sitja á viðbjóðslega óþægilegum stólum langt fram á nótt. Ég á mér ekkert prívatlíf lengur - hundurinn minn urrar á mig. Ég er bara búinn að fá NÓG !!!!," bætti hann við og strunsaði út úr karphúsinu.
Spámaður
óskast til að leiða lítinn söfnuð. Ævilangri tryggð heitið. A.v.á.
Það er sérlega ánægjulegt að taka við viðurkenningu fyrir hönd Baggalúts fyrir framúrskarandi rekstur samsteypunnar, og þar með hluti af þeim 2% fyrirtækja sem geta státað af slíkum árangri. Ljóst er að yfirgnæfandi hluti íslensks atvinnulífs er í tómu tjóni og órafjarri frá því að vera framúrskarandi á nokkurn hátt. Mættu þau taka Baggalút og önnur almennileg fyrirtæki sér til fyrirmyndar og hysja upp um sig rekstrarbrækurnar.
Það eru tíu lykilatriði atriði sem hafa komið Baggalúti á þennan eftirsóknarverða stað, sem rétt er að deila með áhugasömum:
- Ekkert starfsfólk
- Engin viðvera
- Ekkert húsnæði
- Engin þjónusta
- Engin gildi
- Engin frí
- Engin áhætta
- Ekkert internetsamband
- Enginn samningsvilji
- Engin kaffivél
Beri önnur fyrirtæki gæfu til að fylgja fordæmi okkar er ljóst að íslenskur fyrirtækjamarkaður yrði skjótt heilbrigðari og næði undraskjótt að skipa sér í fremstu röð í heiminum. En til þess er lítil von, meðan íslenskir stjórnendur eru upp til hópa óhæfar, ákvarðanafælnar gungur með allan sinn rekstur á bólakafi uppi í bakraufinni á sér.
Góðar stundir.