Sem kunnugt er lést hinn vinsæli barnaskólakennari og túbuleikari, Geirharður Geirsson (Cand.Mag.) á dögunum, aðeins 79 ára að aldri. Í kjölfar andláts hans voru stofnuð minningarsamtök um Geirharð, sem gjarnan vildu minnast hans á veglegan hátt. Svend Friðriksson er formaður samtakanna og gamall nemandi Geirharðs:
"Við ætluðum fyrst að reisa styttu, stofna sjóð og allt þetta hefðbundna - en þá mundum við að Geirharður var mikill áhugamaður um uppstoppun og þá gleði sem varanleg varðveisla af því tagi getur veitt. Við ákváðum því að hafa samband við hamskera, sem græjaði þetta á fáeinum dögum".
Hinn uppstoppaði Geirharður þykir fádæma líflegur og er það einkum þakkað afar raunverulegum vínylaugum, sem engu er líkara en fylgi manni hvert fótmál.
Skipti
NKOTB safnið +a vínyl fæst í skiptum fyrir vel með farnar Slayer plötur og/eða snældur. Afgreiðsla vísar á.
Það er sérlega ánægjulegt að taka við viðurkenningu fyrir hönd Baggalúts fyrir framúrskarandi rekstur samsteypunnar, og þar með hluti af þeim 2% fyrirtækja sem geta státað af slíkum árangri. Ljóst er að yfirgnæfandi hluti íslensks atvinnulífs er í tómu tjóni og órafjarri frá því að vera framúrskarandi á nokkurn hátt. Mættu þau taka Baggalút og önnur almennileg fyrirtæki sér til fyrirmyndar og hysja upp um sig rekstrarbrækurnar.
Það eru tíu lykilatriði atriði sem hafa komið Baggalúti á þennan eftirsóknarverða stað, sem rétt er að deila með áhugasömum:
- Ekkert starfsfólk
- Engin viðvera
- Ekkert húsnæði
- Engin þjónusta
- Engin gildi
- Engin frí
- Engin áhætta
- Ekkert internetsamband
- Enginn samningsvilji
- Engin kaffivél
Beri önnur fyrirtæki gæfu til að fylgja fordæmi okkar er ljóst að íslenskur fyrirtækjamarkaður yrði skjótt heilbrigðari og næði undraskjótt að skipa sér í fremstu röð í heiminum. En til þess er lítil von, meðan íslenskir stjórnendur eru upp til hópa óhæfar, ákvarðanafælnar gungur með allan sinn rekstur á bólakafi uppi í bakraufinni á sér.
Góðar stundir.