George W. Bush forseti Bandaríkjanna íhugar nú að kalla heim hersveitir sínar í Írak. Kemur þetta í kjölfar opinberrar heimsóknar Jean Chrétien, forsætisráðherra Kanada, í Hvíta húsið, þar sem hann gaf Bush skál fulla af afar fallegum laufum.
"Hann sagði þau vera tákn um laufið í kanadíska fánanum," sagði Bush í spjalli við Baggalút. "Þau eru víst mjög góð fyrir sálina og hann ráðlagði mér að setja nokkur í arininn á skrifstofunni minni og nota sem einhvers konar reykelsi."
Bush kveðst hafa farið að endurskoða stríðið í framhaldinu og vill núna bara helst að allir verði vinir. "Svo nenni ég bara ekki lengur þessu endalausa álagi sem fylgir stríði," sagði Bush dreyminn að lokum.
Rjómabollur
Eigum fyrirliggjandi örfáar rjómabollur á frábæru verði - aðeins kr. 100 pr. 10.000 stk. A.v.á.
Það er sérlega ánægjulegt að taka við viðurkenningu fyrir hönd Baggalúts fyrir framúrskarandi rekstur samsteypunnar, og þar með hluti af þeim 2% fyrirtækja sem geta státað af slíkum árangri. Ljóst er að yfirgnæfandi hluti íslensks atvinnulífs er í tómu tjóni og órafjarri frá því að vera framúrskarandi á nokkurn hátt. Mættu þau taka Baggalút og önnur almennileg fyrirtæki sér til fyrirmyndar og hysja upp um sig rekstrarbrækurnar.
Það eru tíu lykilatriði atriði sem hafa komið Baggalúti á þennan eftirsóknarverða stað, sem rétt er að deila með áhugasömum:
- Ekkert starfsfólk
- Engin viðvera
- Ekkert húsnæði
- Engin þjónusta
- Engin gildi
- Engin frí
- Engin áhætta
- Ekkert internetsamband
- Enginn samningsvilji
- Engin kaffivél
Beri önnur fyrirtæki gæfu til að fylgja fordæmi okkar er ljóst að íslenskur fyrirtækjamarkaður yrði skjótt heilbrigðari og næði undraskjótt að skipa sér í fremstu röð í heiminum. En til þess er lítil von, meðan íslenskir stjórnendur eru upp til hópa óhæfar, ákvarðanafælnar gungur með allan sinn rekstur á bólakafi uppi í bakraufinni á sér.
Góðar stundir.