Íraskir hermenn vinna nú allan sólarhringinn að því að treysta varnir höfuðborgarinnar. Bandamenn hafa mótmælt þessu harðlega og saka Íraka um að beita óheiðarlegum og jafnvel ólöglegum aðferðum þar sem þeir noti vopn sem klárlega eiga ekki að vera til í landinu samkvæmt banni SÞ.
Bandarískir sérsveitarmenn hafa þannig fundið aragrúa af teiknibólum sem dreift hefur verið yfir helstu aðkomuleiðir til að stöðva framsókn Bandamanna inní sjálfa borgina.
"Við vitum af þessum hindrunum og þeir valda okkur vissulega áhyggjum enda getur þetta valdið töluverðum meiðslum, sérstaklega hjá berfættum," sagði ónefndur herforingi Bandamanna og reiknar með því að þeir ryðji svæðin með stórfeldum loftárásum áður en þeir halda að borginni.
Af nýslátruðu
Eigum fyrirliggjandi mikið af mávi eftir flugeldasýninguna á Menningarnótt. Kjötvinnsla Reykjavíkurborgar.
Það er sérlega ánægjulegt að taka við viðurkenningu fyrir hönd Baggalúts fyrir framúrskarandi rekstur samsteypunnar, og þar með hluti af þeim 2% fyrirtækja sem geta státað af slíkum árangri. Ljóst er að yfirgnæfandi hluti íslensks atvinnulífs er í tómu tjóni og órafjarri frá því að vera framúrskarandi á nokkurn hátt. Mættu þau taka Baggalút og önnur almennileg fyrirtæki sér til fyrirmyndar og hysja upp um sig rekstrarbrækurnar.
Það eru tíu lykilatriði atriði sem hafa komið Baggalúti á þennan eftirsóknarverða stað, sem rétt er að deila með áhugasömum:
- Ekkert starfsfólk
- Engin viðvera
- Ekkert húsnæði
- Engin þjónusta
- Engin gildi
- Engin frí
- Engin áhætta
- Ekkert internetsamband
- Enginn samningsvilji
- Engin kaffivél
Beri önnur fyrirtæki gæfu til að fylgja fordæmi okkar er ljóst að íslenskur fyrirtækjamarkaður yrði skjótt heilbrigðari og næði undraskjótt að skipa sér í fremstu röð í heiminum. En til þess er lítil von, meðan íslenskir stjórnendur eru upp til hópa óhæfar, ákvarðanafælnar gungur með allan sinn rekstur á bólakafi uppi í bakraufinni á sér.
Góðar stundir.