Fréttamaður Baggalúts hefur afhjúpað skipulagt vændi meðal starfsmanna Þjóðarbókhlöðunnar. Svo virðist sem mikið af starfsfólkinu hafi stundað ósiðlega iðju sína í bakherbergjum hússins sem byggt var sem musteri íslenskrar hámenningar. Höfuðpaurinn í málinu er landsþekktur bókasafnsfræðingur sem starfað hefur um áratugaskeið í faginu. Grunsemdir vöknuðu vegna glæsibílaflota starfsfólks sem þykir í engu samræmi við launataxta þess.
Skv. heimildum Baggalúts hefur verið boðið upp á ýmsa 'slökunarþjónustu' svo og einkasamkvæmi eftir lokun.
Lögregla rannsakar nú málið.
Tók einhver
upp sniglamyndina skemmtilegu á RÚV í gær? Er tilbúinn að greiða vel fyrir upptökuna. A.v.á.
Það er sérlega ánægjulegt að taka við viðurkenningu fyrir hönd Baggalúts fyrir framúrskarandi rekstur samsteypunnar, og þar með hluti af þeim 2% fyrirtækja sem geta státað af slíkum árangri. Ljóst er að yfirgnæfandi hluti íslensks atvinnulífs er í tómu tjóni og órafjarri frá því að vera framúrskarandi á nokkurn hátt. Mættu þau taka Baggalút og önnur almennileg fyrirtæki sér til fyrirmyndar og hysja upp um sig rekstrarbrækurnar.
Það eru tíu lykilatriði atriði sem hafa komið Baggalúti á þennan eftirsóknarverða stað, sem rétt er að deila með áhugasömum:
- Ekkert starfsfólk
- Engin viðvera
- Ekkert húsnæði
- Engin þjónusta
- Engin gildi
- Engin frí
- Engin áhætta
- Ekkert internetsamband
- Enginn samningsvilji
- Engin kaffivél
Beri önnur fyrirtæki gæfu til að fylgja fordæmi okkar er ljóst að íslenskur fyrirtækjamarkaður yrði skjótt heilbrigðari og næði undraskjótt að skipa sér í fremstu röð í heiminum. En til þess er lítil von, meðan íslenskir stjórnendur eru upp til hópa óhæfar, ákvarðanafælnar gungur með allan sinn rekstur á bólakafi uppi í bakraufinni á sér.
Góðar stundir.