Ingigerður Ásbjargardóttir, feministi, lét sænskan seiðkarl breyta eiginmanni sínum, Birgi Haraldssyni, í rottu.
"Ég er margoft búin að vara hann við að ef hann vaskaði ekki upp léti ég breyta honum, en hann bara hlustaði ekki. Hann vildi frekar horfa á fréttirnar og því fór sem fór," sagði Ingigerður og tók það fram að þessi sérstæða þjónusta væri "..alls ekki eins dýr og maður hefði haldið."
Birgir, sem er áttundi eiginmaður Ingigerðar, má að vissu leyti prísa sig sælan yfir þessum örlögum sínum, en hún át hina sjö.
Barnabox
Foreldrar, nú þurfa litlu englarnir að læra að slá frá sér. Erum að skrá í alla aldursflokka. Opið er fyrir veðmál alla daga frá 8.00 og fram að bardaga kl. 19.30.
Það er sérlega ánægjulegt að taka við viðurkenningu fyrir hönd Baggalúts fyrir framúrskarandi rekstur samsteypunnar, og þar með hluti af þeim 2% fyrirtækja sem geta státað af slíkum árangri. Ljóst er að yfirgnæfandi hluti íslensks atvinnulífs er í tómu tjóni og órafjarri frá því að vera framúrskarandi á nokkurn hátt. Mættu þau taka Baggalút og önnur almennileg fyrirtæki sér til fyrirmyndar og hysja upp um sig rekstrarbrækurnar.
Það eru tíu lykilatriði atriði sem hafa komið Baggalúti á þennan eftirsóknarverða stað, sem rétt er að deila með áhugasömum:
- Ekkert starfsfólk
- Engin viðvera
- Ekkert húsnæði
- Engin þjónusta
- Engin gildi
- Engin frí
- Engin áhætta
- Ekkert internetsamband
- Enginn samningsvilji
- Engin kaffivél
Beri önnur fyrirtæki gæfu til að fylgja fordæmi okkar er ljóst að íslenskur fyrirtækjamarkaður yrði skjótt heilbrigðari og næði undraskjótt að skipa sér í fremstu röð í heiminum. En til þess er lítil von, meðan íslenskir stjórnendur eru upp til hópa óhæfar, ákvarðanafælnar gungur með allan sinn rekstur á bólakafi uppi í bakraufinni á sér.
Góðar stundir.