Björgvin Björgvinsson skíðamaður var dæmdur úr leik eftir fyrri umferð stórsvigskeppninnar á heimsmeistaramótinu í alpagreinum í St. Moritz í Sviss. Björgvin fer því ekki síðari ferðina en hann var skráður í 46. sæti eftir fyrri ferð.
Var búningur Björgvins úrskurðaður ólöglegur eftir nákvæma skoðun og Björgvin því vísað úr keppni. "Þetta er náttúrulega rosalega svekkjandi," sagði Björgvin. "Ég og mamma vorum í alla nótt að klára búninginn og svo er honum ekki tekið betur en þetta!"
Taldi Björgvin þennan úrskurð afar ósanngjarnan "... sérstaklega þar sem sænski keppandinn fékk að vera í Spæderman-búning."
Tapað fundið
Hvítt og móbrúnt lamadýr týndist einhversstaðar milli Hveragerðis og Eyrarbakka um helgina. Svarar nafninu Hermann. Fundarlaun. Skilvís finnandi hafi samband við afgreiðslu Baggalúts.
Það er sérlega ánægjulegt að taka við viðurkenningu fyrir hönd Baggalúts fyrir framúrskarandi rekstur samsteypunnar, og þar með hluti af þeim 2% fyrirtækja sem geta státað af slíkum árangri. Ljóst er að yfirgnæfandi hluti íslensks atvinnulífs er í tómu tjóni og órafjarri frá því að vera framúrskarandi á nokkurn hátt. Mættu þau taka Baggalút og önnur almennileg fyrirtæki sér til fyrirmyndar og hysja upp um sig rekstrarbrækurnar.
Það eru tíu lykilatriði atriði sem hafa komið Baggalúti á þennan eftirsóknarverða stað, sem rétt er að deila með áhugasömum:
- Ekkert starfsfólk
- Engin viðvera
- Ekkert húsnæði
- Engin þjónusta
- Engin gildi
- Engin frí
- Engin áhætta
- Ekkert internetsamband
- Enginn samningsvilji
- Engin kaffivél
Beri önnur fyrirtæki gæfu til að fylgja fordæmi okkar er ljóst að íslenskur fyrirtækjamarkaður yrði skjótt heilbrigðari og næði undraskjótt að skipa sér í fremstu röð í heiminum. En til þess er lítil von, meðan íslenskir stjórnendur eru upp til hópa óhæfar, ákvarðanafælnar gungur með allan sinn rekstur á bólakafi uppi í bakraufinni á sér.
Góðar stundir.