Vésteinn Hallgrímsson, vélstjóri á Ísafirði varð fyrir þeirri fádæma reynslu á dögunum að fá tungl á braut um sig.
"Ég var á leiðinni í sund einn morguninn og tók eftir einkennilegum hvin svo ég sneri mér í hringi svona og sá þá hvar hnöttóttur hlutur þeyttist kringum hausinn á mér. Ég varð nokkuð hissa þegar ég áttaði mig á því að hér væri um tungl að ræða, eða smástirni af einhverju tagi. Ég finn töluvert fyrir áhrifum tunglsins, því er ekki að neita, t.d. er ég allur örari og frjórri þegar það er fullt", sagði Vésteinn í samtali við blaðamann. Hann telur skýringuna helst vera þyngdaraukningu sína í sumar: "já ég var á Kanarí sko í tvo mánuði og bætti soldið á mig - þetta hefur að minnsta kosti eitthvað með þyngdaraflið að gera, það er pottþétt".
Að sögn sérfræðinga geimferðastofnunar HÍ er hér um nokkuð sjaldgæft fyrirbæri að ræða, þó ekki einsdæmi - t.d. er talið að ýmiskonar "rusl" sé á sveimi kringum Össur Skarphéðinsson, Gauja litla og fleiri.
Tilkynning frá Herjólfi
Ég er hættur að elska.
Kv.
H
Það er sérlega ánægjulegt að taka við viðurkenningu fyrir hönd Baggalúts fyrir framúrskarandi rekstur samsteypunnar, og þar með hluti af þeim 2% fyrirtækja sem geta státað af slíkum árangri. Ljóst er að yfirgnæfandi hluti íslensks atvinnulífs er í tómu tjóni og órafjarri frá því að vera framúrskarandi á nokkurn hátt. Mættu þau taka Baggalút og önnur almennileg fyrirtæki sér til fyrirmyndar og hysja upp um sig rekstrarbrækurnar.
Það eru tíu lykilatriði atriði sem hafa komið Baggalúti á þennan eftirsóknarverða stað, sem rétt er að deila með áhugasömum:
- Ekkert starfsfólk
- Engin viðvera
- Ekkert húsnæði
- Engin þjónusta
- Engin gildi
- Engin frí
- Engin áhætta
- Ekkert internetsamband
- Enginn samningsvilji
- Engin kaffivél
Beri önnur fyrirtæki gæfu til að fylgja fordæmi okkar er ljóst að íslenskur fyrirtækjamarkaður yrði skjótt heilbrigðari og næði undraskjótt að skipa sér í fremstu röð í heiminum. En til þess er lítil von, meðan íslenskir stjórnendur eru upp til hópa óhæfar, ákvarðanafælnar gungur með allan sinn rekstur á bólakafi uppi í bakraufinni á sér.
Góðar stundir.