Það varð uppi fótur og fit í Ásgarði, griðsvæði norrænna goða í Mosfellsbæ, þegar í ljós kom að Fenrisúlfur hafði slitið fjötur sinn og stungið af. Þetta er í þriðja sinn sem úlfurinn sleppur á þessu ári og hafa bæjaryfirvöld hótað ásum að skepnan verði aflífuð komi þetta fyrir aftur.
Fólk er beðið að hafa vara á sér því úlfurinn getur verið órólegur á fullu tungli og dæmi eru um að hann gelti að ellilífeyrisþegum og blaðburðarfólki.
Fenrisúlfur er auðþekkjanlegur á óvenjulegri stærð sinni, en hann er á hæð við Hallgrímskirkjuturn, auk þess sem hann er afar fíkinn í súkkulaði og frönsk smábrauð. Þeim sem hafa upplýsingar um ferðir hans eru beðnir að hafa samband við Ásatrúarfélagið hið snarasta.
Fallaxir
Handhægu ferðafallaxirnar komnar aftur. Ýmsir litir.
Litla hryllingsbúðin
Það er sérlega ánægjulegt að taka við viðurkenningu fyrir hönd Baggalúts fyrir framúrskarandi rekstur samsteypunnar, og þar með hluti af þeim 2% fyrirtækja sem geta státað af slíkum árangri. Ljóst er að yfirgnæfandi hluti íslensks atvinnulífs er í tómu tjóni og órafjarri frá því að vera framúrskarandi á nokkurn hátt. Mættu þau taka Baggalút og önnur almennileg fyrirtæki sér til fyrirmyndar og hysja upp um sig rekstrarbrækurnar.
Það eru tíu lykilatriði atriði sem hafa komið Baggalúti á þennan eftirsóknarverða stað, sem rétt er að deila með áhugasömum:
- Ekkert starfsfólk
- Engin viðvera
- Ekkert húsnæði
- Engin þjónusta
- Engin gildi
- Engin frí
- Engin áhætta
- Ekkert internetsamband
- Enginn samningsvilji
- Engin kaffivél
Beri önnur fyrirtæki gæfu til að fylgja fordæmi okkar er ljóst að íslenskur fyrirtækjamarkaður yrði skjótt heilbrigðari og næði undraskjótt að skipa sér í fremstu röð í heiminum. En til þess er lítil von, meðan íslenskir stjórnendur eru upp til hópa óhæfar, ákvarðanafælnar gungur með allan sinn rekstur á bólakafi uppi í bakraufinni á sér.
Góðar stundir.