Alþingi sendi í morgun frá sér fréttatilkynningu þar sem greint er frá því að hæstvirtur forseti Alþingis Íslendinga, Halldór Blöndal, sé rugludallur. Að sögn umboðsmanns Alþingis mun þetta vera niðurstaða leynilegrar nefndar sem sér um innra eftirlit á þingi. Þingmönnum var að vonum brugðið við þessar fréttir . "Ég hef nú aldrei botnað neitt í honum Halldóri", sagði Össur Skarphéðinsson í samtali við Baggalút, "...en það er nú aðallega vegna þess að hann er svo skrambi þvoglumæltur. Þetta er áfall fyrir gjörvallan þingheim". Ekki er ráðgert að skipta um forseta þingsins enda staðan vita gagnslaus hvort eð er.
Yfirlýsing
Þungyrði þau er ég lét ölvaður falla í garð Vilhjálms Egilssonar afturkalla ég hér með.
Reykjavík, Apríl 2009
Davíð Oddsson
Það er sérlega ánægjulegt að taka við viðurkenningu fyrir hönd Baggalúts fyrir framúrskarandi rekstur samsteypunnar, og þar með hluti af þeim 2% fyrirtækja sem geta státað af slíkum árangri. Ljóst er að yfirgnæfandi hluti íslensks atvinnulífs er í tómu tjóni og órafjarri frá því að vera framúrskarandi á nokkurn hátt. Mættu þau taka Baggalút og önnur almennileg fyrirtæki sér til fyrirmyndar og hysja upp um sig rekstrarbrækurnar.
Það eru tíu lykilatriði atriði sem hafa komið Baggalúti á þennan eftirsóknarverða stað, sem rétt er að deila með áhugasömum:
- Ekkert starfsfólk
- Engin viðvera
- Ekkert húsnæði
- Engin þjónusta
- Engin gildi
- Engin frí
- Engin áhætta
- Ekkert internetsamband
- Enginn samningsvilji
- Engin kaffivél
Beri önnur fyrirtæki gæfu til að fylgja fordæmi okkar er ljóst að íslenskur fyrirtækjamarkaður yrði skjótt heilbrigðari og næði undraskjótt að skipa sér í fremstu röð í heiminum. En til þess er lítil von, meðan íslenskir stjórnendur eru upp til hópa óhæfar, ákvarðanafælnar gungur með allan sinn rekstur á bólakafi uppi í bakraufinni á sér.
Góðar stundir.