Stefán Sigurjónsson, húsgagnasmiður, datt heldur betur í lukkupottinn þegar dregið var í happdrætti Þjóðminjasafnsins á föstudaginn. Stefán hreppti nefnilega fyrsta vinning; tvær múmíur sem fundust við uppgröft á Þingvöllum í sumar. Múmíurnar eru taldar um 6000 ára gamlar og ákvað menntamálaráðuneytið, sem hafði umsjón með uppgreftrinum, að færa Þjóðminjasafninu múmíurnar til varðveislu. Þjóðminjavörður ákvað að gefa múmíurnar í happdrætti safnsins, en sem kunnugt er stendur nú yfir fjáröflun svo ljúka megi framkvæmdum í fatahengi safnsins.
"Jú það er rétt, við ákváðum að gefa þessar ómetanlegu múmíur svona til að ýta undir sölu á happdrættismiðum - reyndar hefur safnið ekkert að gera við gripi af þessu tagi, enda passar þetta enganveginn inn í þá sögu og menningu sem Þjóðminjasafnið endurspeglar", sagði þjóminjavörður í samtali við blaðamann Baggalúts.
Leðurblökumenn
Fjölmennum í hópferð á kvikmyndina skemmtilegu, og raunsæju, um Rökkurriddarann. - Félagið
Það er sérlega ánægjulegt að taka við viðurkenningu fyrir hönd Baggalúts fyrir framúrskarandi rekstur samsteypunnar, og þar með hluti af þeim 2% fyrirtækja sem geta státað af slíkum árangri. Ljóst er að yfirgnæfandi hluti íslensks atvinnulífs er í tómu tjóni og órafjarri frá því að vera framúrskarandi á nokkurn hátt. Mættu þau taka Baggalút og önnur almennileg fyrirtæki sér til fyrirmyndar og hysja upp um sig rekstrarbrækurnar.
Það eru tíu lykilatriði atriði sem hafa komið Baggalúti á þennan eftirsóknarverða stað, sem rétt er að deila með áhugasömum:
- Ekkert starfsfólk
- Engin viðvera
- Ekkert húsnæði
- Engin þjónusta
- Engin gildi
- Engin frí
- Engin áhætta
- Ekkert internetsamband
- Enginn samningsvilji
- Engin kaffivél
Beri önnur fyrirtæki gæfu til að fylgja fordæmi okkar er ljóst að íslenskur fyrirtækjamarkaður yrði skjótt heilbrigðari og næði undraskjótt að skipa sér í fremstu röð í heiminum. En til þess er lítil von, meðan íslenskir stjórnendur eru upp til hópa óhæfar, ákvarðanafælnar gungur með allan sinn rekstur á bólakafi uppi í bakraufinni á sér.
Góðar stundir.