Margir kannast við Garp, en hann striplast oft í Fossvoginum á góðviðrisdögum.

Ofurhetjan Garpur hefur létt leynd af hinu raunverulega sjálfi sínu, fyrst íslenskra ofurhetja.

Mun hann í raun vera Adam Einarsson, prins, búsettur í Fossvoginum ásamt aldraðri móður sinni og gæluketti.

Tíðindin koma fáum á óvart, enda er Garpur sennilega eina ofurhetjan sem ekki styðst við dulargervi af neinu tagi, heldur lætur sér nægja að afklæðast þegar hann fer í „ofurham“.

Kulnunin sem Bergur hefur orðið fyrir er áþreifanleg.

Bergur Baldursson, skrifstofumaður, hefur orðið fyrir heiftarlegri kulnun í starfi undanfarið. Hann hefur ítrekað farið heim með hélað skegg, gaddfreðnar nasir og þrálátan hósta auk þess sem hann hefur vart undan að þerra móðu af lesgleraugum sínum.

Kennir hann samstarfsmanni sínum, Þuríði Þrándardóttur, um kulnunina, en hún aftekur með öllu að loka glugga í sameiginlegri vinnuaðstöðu þeirra í Borgartúni – í það minnsta þar til Bergur hefur baðað sig.

Ertu ekki að fokkings djóka með þessar augabrúnir kona?

Ellý Ármannsdóttir er hætt slúður- og slefburðardeild Vísis.

Ekki er fyllilega ljóst hvers vegna, en að sögn samstarfsfólks hennar mun þessi drottning gjálífisumræðunnar á Íslandi hafa rokið út af ritstjórn Vísis eldsnemma í morgun og skellt á eftir sér öllum tiltækum hurðum.

Mun Ellý hafa setið alla nóttina og reynt að finna eitthvað athugavert við klæðaburð, vaxtarlag, hárgreiðslu, andlitsförðun eða ástand húðar skærustu stjarnanna á Óskarsverðlaunahátíðinni – án árangurs.

Guðfríður Lilja hefur látið óvenju ófriðlega undanfarið.

Mikið hefur gengið á í dag á órólegu deildinni hjá Vinstri Grænum.

Hefur Ögmundur Jónasson í þrígang setið fyrir Steingrími J. Sigfússyni, kallað hann ýmsum miður fallegum nöfnum og bleytt buxur hans – bæði með sápuvatni og krækiberjasaft.

Auk þess manaði Ögmundur Lilju Mósesdóttur til að klína ljósbleiku Hubba Bubba kúlutyggjói í hár formannsins – en það heppnaðist, af augljósum ástæðum, ekki.

Þá hefur nesti Katrínar Jakobsdóttur, hálfu epli og samloku með hnetusmjöri, verið stolið. Sömuleiðis forláta húfu Jóns Bjarnasonar, en hún sást síðast í fórum Guðfríðar Lilju Grétarsdóttur. Mun það vera 12 höfuðfat landbúnaðarráðherra sem hverfur sporlaust frá áramótum.

Baugspennar þykja nokkuð eftirsóttir um þessar mundir, enda flestir týndir – eða í felum.

Fagurgulur penni sem talið er líklegt að sé svokallaður „baugspenni“ fannst við tiltekt á ritstjórnarskrifstofum Baggalúts í morgun.

Penninn er afar áferðarfagur og smekklegur, en skrifar lítið sem ekkert nema þrýst sé duglega á hann.

Er eigandi pennans (eða fulltrúi kröfuhafa) beðinn að vitja hans í afgreiðslu.

Kjósandinn, fyrir miðju, ásamt starfsmönnum kjörfundar.

Karlmaður á fertugsaldri mætti á kjörstað nú laust fyrir klukkan 19.00.

Kom þetta starfsfólki í Laugardalshöll nokkuð í opna skjöldu, því þetta er fyrsti kjósandinn sem mætir til að kjósa í yfirstandandi þjóðaratkvæðagreiðslu.

Þegar til kom reyndist kjósandinn ekki vera á kjörskrá, en hann er belgískur ríkisborgari.