Freddi hefur áður unnið ýmis trúnaðarstörf fyrir flokkinn.

Hart er nú lagt að blindrahundinum Fredda að leiða lista framsóknarflokksins í komandi borgarstjórnarkosningum í Reykjavík.

Freddi þykir einstaklega úrræðagóður, árangursdrifinn og ákveðinn. Auk þess á hann auðvelt með að leysa flókin verkefni undir mikilli pressu. Þá þykir hann bæði félagslyndur og skapgóður.

Ekki náðist í Fredda við gerð þessarar fréttar.

Þrándur lét skíra sig í fyrra. Og fékk fínan pening þá.

Þrándur Guðríðarson, fyrrum háskólakennari og skáld, hyggst láta ferma sig um helgina og staðfesta þar með skírn sína.

„Mig vantar pening, það er svona aðalástæðan,“ segir Þrándur sem ætlar að halda veisluna á heimili sínu á skírdag. Og lofar góðu stuði.

„Það verður nóg af búsi fyrir þá sem koma með pening. Ég vil alls ekki einhverjar orðabækur og áttavita og eitthvað kjaftæði. Bara monnís. Mig vantar pening.“

Karl starfaði áður sem grafhýsahönnuður.

Karl Karlsson, gjaldkeri, hefur opnað svokallaðan Hversdagssjóð, „þar sem fólk getur geymt peninga sem það ætlar mögulega að nota einhvern tímann aftur,“ eins og segir í tilkynningu.

„Þetta er byggt á gamla góða sparisjóðamódelinu, nema þetta er ekkert spari. Bara svona hversdags. Fólk getur komið í gallabuxum og lagt inn. Eða jogginggalla, mér er drullusama,“ segir Karl, sem segir sárlega vanta slíka þjónustu.

„Ég ætla bara að geyma peninga fyrir fólk og ekki gera neitt við þá nema eigendurnir biðji sérstaklega um að fá þá aftur, með svokölluðum vöxtum. Þetta er í raun bylting í íslenskum bankaviðskiptum.“

Enn sem komið er býður litunarþjónusta Framsóknarflokksins upp á einn lit; „Mountain Dew - grænan.“

Salóme S. Salómonsdóttir, lífrænn heilari, er hætt að lita á sér hárið sjálf. Hún nýtir sér heldur nýja þjónustu sem boðið er upp á á skrifstofum Framsóknarflokksins víða um land.

Sífellt fleiri konur þiggja slíka litun og telja margar þeirra að með þessari þjónustu hafi íslenskum stjórnmálaflokki loksins tekist að koma að fullu til móts við þarfir skuldsettra heimila í landinu.

Gamla tekjumódelið reyndist skítsæmilega.

Íslenska leikjafyrirtækið Plain Vanilla hefur ýtt úr vör nýju tekjumódeli fyrir tölvuleikinn QuizUp! sem fyrirtækið gaf út á síðasta ári.

Í kjölfarið ákvað stjórn Baggalúts að gera tilboð í gamla tekjumódelið fyrir leikinn, enda hefur það reynst ágætlega.

Vonast Baggalútur til að spurningaleikurinn BaggÖpp, sem byggir á tekjumódelinu líti dagsins ljós í næstu eða þarnæstu viku.

Talið er að andvirði kaupaukanna geti numið allt að 200 kg af rófum á ári.

Skóverkstæði Hermanns Invest hefur ákveðið að greiða eigendum og starfsmönnum sínum kaupauka í samræmi við tillögur um að fjármálafyrirtæki megi greiða árslaun í kaupauka.

Skóverkstæðinu var breytt í fjárfestingafyrirtæki fyrir skömmu, sem leggur áherslu á vandaðar skóviðgerðir og fjárfestingar í neysluvarningi fyrir eigendur sína og starfsmenn.

Í tilkynningu frá stjórninni er talið að kaupaukarnir geti numið þúsundum króna á ári. Sem deilast jafnt á eigendur og starfsmenn.

Maðurinn hefur áður komið við sögu lögreglu í „stóra ukulelemálinu,“ sem svo var kallað.

Sérsveitin yfirbugaði í morgun karlmann á þrítugsaldri á sólpalli raðhúss í Grafarvogi þar sem hann var með ógnandi tilburði. Maðurinn var vopnaður.

Eftir að náðist að yfirbuga manninn kom á daginn að hann var með afar vandaða eftirlíkingu af boga og örvum sem full ástæða var talin til að ætla að væri stórhættuleg.

Sæmkvæmt heimildum Baggalúts bar maðurinn fyrir sig að hann væri skemmtikrafturinn Aggi Indjáni og að hann væri að skemmta börnum í barnaafmæli í húsinu. Skýringar hans voru ekki teknar trúanlegar og hefur maðurinn verið vistaður á óviðeigandi stofnun.

Myndin er úr myndasafni.

Ónefndur forsætisráðherra í áhrifalitlu dvergríki í norðurhöfum setti óvart svokallað „læk“ við loftslagsbreytingar af mannavöldum í kvöld.

Ekki er ljóst hvort forsætisráðherranum var alvara með lækinu, enda hefur hann áður sýnt óútreiknanlega og óábyrga hegðun á netinu.

Skemmst er að minnast þess þegar ráðherrann „blokkaði“ nær alla leiðtoga aðildarríkja Evrópusambandsins og „pókaði“ í kjölfarið formann rússnesku bændasamtakanna, forseta alþýðulýðveldisins Kína og tónlistarmanninn geðþekka Sting.

Gabbið verður afhjúpað á miðnætti.

Ritstjórn Baggalúts undirbýr nú aprílgabb sitt fyrir árið 2014 og eru framkvæmdir á lokastigi.

Gabbið, sem verður hið umfangsmesta sinnar tegundar til þessa, er unnið í nánu samstarfi við Íslenska dansflokkinn, landhelgisgæsluna, frímúrarahreyfinguna, EGG leikhúsið, Mezzoforte, samtökin lækna án landamæra og skilanefnd gamla Landsbankans.

Um 400 sjálfboðaliðar leggja nú lokahönd á gabbið, sem verður afhjúpað strax upp úr miðnætti, 1. apríl. Gera áætlanir ráð fyrir að um 270 þúsund Íslendingar muni láta gabbast að þessu sinni og freisti þess að sjá krakkana í ríkisstjórninni, staðgengil Íþóttaálfsins og Megas þykjast ætla að gefa öllum Íslendingum einn aur af sýndargjaldmiðlinum íslenskri krónu, ásamt kaldri pylsu og volgri dós af ískóla.

Úrslit munu liggja fyrir á stjörnudegi 523-23B.

Jarðarbúar ganga að kjörborðinu í dag í fimmtíuogfimmþúsundtvöhundruðogþriðju vetrarbrautarstjórnarkosningunum. Búist er við spennandi kosningum, en meðal annars er tekist á um hvort halda eigi áfram sameiningarferli við dvergvetrarbrautina Canis Major, sem staðið hefur yfir með hléum í nokkra milljarða ára.

Ekki er búist við mikilli kjörsókn meðal jarðarbúa, enda íbúar okkar stjörnukerfis með aðeins um 1,7x10e-189 prósent af heildar fjölda atkvæða, auk þess sem ójafnt vægi atkvæða veldur því að rafgasþörungur á plánetunni ZB-48 getur í raun ákveðið úrslit kosninganna upp á sitt einsdæmi.